Unha superficie de 4 ha ocupada polo bosque de ribeira da Lagoa de Budiño (hábitat de protección prioritaria prá UE) podería ser aterrado nos vindeiros meses logo da recente modificación do PXOM do Porriño (Decreto 139/2007) na área natural das Gándaras de Budiño e Ribeiras do Louro. Verdegaia non entende como a Consellaría do Ambiente e o Concello do Porriño autorizan a eliminación dun terreo de altísimo valor ecolóxico, fundamental para a conservación da Lagoa de Budiño e acubillo de fauna en perigo de extinción para a construción de equipamentos deportivos.

No lugar do Cerquido, concello do Porriño, existe dende hai moitos anos unha explotación de arxila situada no espazo natural das Gándaras de Budiño e Ribeiras do Louro malia que no ano 2004 foi desanexada da Rede Natura permanecendo como SRPEN no PXOM do Porriño.

Como resultado da actividade extractiva formáronse dúas barreiras que, tras o abandono da actividade, foron colonizadas por unha grande cantidade de flora e fauna do espazo protexido. Entre a fauna destacaba a presenza do sapoconcho (Emys orbicularis), especie en perigo de extinción segundo se recolle no Catálogo Galego de Especies Ameazadas (Decreto 88/2007) e de Interese Comunitario segundo a Directiva 92/43 CEE o que obriga a designar Zonas de Especial Conservación e a fornecerlles unha protección estrita.
No ano 1998 unha das barreiras foi aterrada sen aviso previo e con materiais alleos á explotación o que provocou a morte de 13 dos 20 sapoconchos que moraban nela. Dende aquela até agora véñense facendo movementos esporádicos de terra, pensamos que co único fin de evitar a caducidade da concesión, entre outras cousas, para favorecer a reclasificación do SRPEN a Solo Industrial.
Na actualidade a Subdirección Xeral de Recursos Minerais está a solicitar do concesionario a extracción de áridos sen ter en conta os graves prexuízos ambientais que isto vai ocasionar: graves afeccións a flora e a fauna, mais non so:

• Eliminaríase o talude de terra que separa visual e acusticamente o espazo protexido da autovía Porriño-Tui.

• Neste talude aniña todas as primaveras e veráns a andoriña das barreiras (Riparia riparia), especie que ten neste lugar a única poboación estival do espazo protexido e unha das poucas da Galiza.

• Baixo este talude vive a única poboación por nós coñecida da outrora abondosa planta carnívora chamada papamoscas ou rorella (Drosera rotundifolia). Calquera modificación do terreo provocaría a desaparición desta poboación.

• Hai pouco foi visto na barreira un xuvenil de garza imperial (Ardea purpurea) especie catalogada de Interese Especial pola Directiva 79/409/CEE o que é mostra da potencialidade deste lugar.

• A barreira e as zonas anexas son utilizadas polo sapoconcho (especie para a que se esixe un Plano de Recuperación dada a súa crítica situación a nível galego) a pesar das alteracións ilegais sufridas na contorna no ano 2004 (construción dun muro de pedra, alongamento dunha pista encol dos hábitats prioritarios da Turbeira do Cerquido e atoamento do rego que comunicaba a barrreira coa turbeira).

• Na turbeira citada moran tres plantas en perigo de extinción a nível galego e rexistradas no Libro Vermello da Flora Vascular Ameazada de España.

A asociación ecoloxista Verdegaia alerta de que a pesar das denuncias realizadas a finais do mes de xuño, a empresa Transportes Marsou segue a obrar ilegalmente nunha parcela clasificada como Solo Rústico de Protección de Espazos Naturais (SRPEN) no PXOM porriñés.

Segundo a información da que dispomos e en contra do anunciado nos medios de comunicación, o goberno municipal non decretou a paralización da obra nin remitiu o expediente á Consellaría de Política Territorial. Lembramos que a parcela aterrada se encontra na chaira de inundación do río Louro xunto á Turbeira do Cerquido, un dos ecosistemas máis fráxeis e valiosos da área protexida.